Silence Love

خلونا نقول حاجه مهمه ، ان كل واحد مننا في حاجه دائمه وملحه انه يلاقي شخص بيفهم صمته ، مش معني اني مش بتكلم اني بكرهك او مش بحبك او انا بتجاهلك ، ممكن يكون الصمت احيانا بيوجع ناس مش متعودين عالصمت ، لاكن في اخري في ناس متعودين علي السكوت ، بياكلوا في صمت ، بيلعبوا في صمت ، بيقرأو في صمت ، بيفكروا في صمت ، بيتحركوا في صمت ، بيحبوا في صمت 
المضحك انهم بيحبوا في صمت 😂 
ييجي واحد يقولي انتا اتجننت خالص 
بيحبوا في صمت ازاي يعني ، اقوله مش جنان ولا حاجه ، كل الموضوع انهم دائمين الفكر في كل حاجه ، مرضي بالتفكير ، بيحسبوا لكل حاجه ، بيحسوا ان كلام الغزل او كلمة بحبك وبحبك اللي الطرفين بيقولوها لبعض ليها وقت يستحق لفظها ، 😂😂😂هيقوم عامل كده ويقولي ليها وقت يستحق لفظها ، انتا عبيط بقي مش مجنون بس 
اقوله ابدا والله تعالي نتخيل كدا انك كل ساعه بتاكل معلقة عسل نحل او حاجه مسكره (ها فكرت) نفسك عملت كده 😫😲 ، اتقرفت وزهقت منه ، هتروح تدور عالمش والمخلل عشان نفسك جزعت من العسل. 
طبعا انتا عامل كدا 🤔🙄🙃 .
طيب جرب كده تاكل مش ولا فول ولا مخلل كل ساعه مره هتقوم عامل كده يععععععععععع 😦.

دي حقيقه انتا كشخص عنده نفس بشريه غريبة التركيب ومعقده ولم يتم فك شفرتها بالكامل لحد دلوقتي ، متقلب متغير ، محتاج تدوق من كل حاجه حبه ، مينفعش تفضل في مشاكل علي طول هتقرف وتتخنق وتعمل حاجه من اتنين اما تفضل حاطط نفسك في المشاكل بصفه دائمه ، وده هيأثر عليك وعلي عمرك وهتلاقي نفسك مريض بالضغط وعصبي بصفه دائمه ، يااما هتشد الفيشه هوب انسي اهرب اهرب اهرب لحد ماتتصدم بواقع مؤلم ان انتا وصلت لطريق مسدود 
هتكلم نفسك وتشتكي لربنا وتقوله عملت فيه ليه كده ( بس ياغبي) ربنا معملش فيك حاجه ، دي نفسك اللي عملت كده انتا تجاهلت مشاكلك لحد ماتفاقمت وكبرت وبقت قددددددددد الجبل.
طيب لو انتا متجاهلتش عمرك هيقصر وصحتك هتضيع ( الاعمار بيد الله) بس ربنا قال ولا تلقوا بايديكم الي التهلكه .
انتا عايز ايه ياعم انتا ، ده شكله مجنون بجد بقا. 
انا عايزك تكون متزن ، متصالح مع نفسك ، متعقل ، بتفكر في كلامك لمده ((10 ثواني)) بس ، عايزك انسان بضمير حي، عندك قلب ، بتفهم الكلام ، وبتفهم الصمت ، والغضب ، والضحك ، بتفهم المسئوليه ، بتفهم يعني ايه انسان ، ((بتفهم)) حط تحتها مليون خط. 
عارف مش كل الناس بتفهم ، بس جايز انا اتعلمت غلط انا قالولي افهم تحفظ احفظ تنسي ، عارف انا مريض وعارف اني مريض ، بس مش مريض بمرض معدي والا كان زمان كل الناس زيي ، بس مريض مرض نادر مش عارف ايه هوا او ايه تفسيره.
عارف هرجعك ورا شويه بس عارف موضوع كلمة بحبك ، تعالي كده بص علي الاجانب ( زوج وزوجته) او (ام و ابنها) (او اب وابنه) ، عارف بيقولو لبعض بحبك امتا ، لما يجبلها هديه او حاجه كان نفسها فيها ، لما يعدوا ازمه سوا بياخدها فحضنه ويضمها ويحس قد ايه هيا استحملت معاه قرف وهم كبير ، لما ابنهم ينجح بيضمهم ويقولهم بحبكوا من كل قلبه بصدق لانه بيحس بمجهود الابن اللي ذاكر والام اللي ربت وتعبت ، لما جوزها يرجع زعلان ومغموم ومكشر من الشغل تاخده في حضنها وتقوله انا بحبك متزعلش نفسك متشيلش هم بكره ، 
قبل مايناموا بيذكروا بعض انهم بتربطهم رابطه قويه (الحب) ، شوفت الموضوع سهل ازاي وبسيط من غير عك وتكاليف وفي مواقف تانيه كتير بتخليك تقولها لوحدك ، ومش بحبك بس كلام الحب عموما كتره بيجزز النفس سوا للراجل او الست مش معني انها او انه مبيقولش كلام حلو انه مبيحبكش او مبتحبكش ، لا اطلاقا بالعكس حب الصمت ده حاجه غريبه قوي فيها رباط ميعرفهوش غير اللي جربه. 
هييجي واحد بقا يعملي كده 😂😂 ويقولي رباط طب شوف رباط جزمتك هعههعهعهع ، رباط ايه ياعم انتا عالارض مفيش الكلام ده مش في المدينة الفاضله ، اصحا فوق يابا انتا في مصر ام الدنيا كلها ، لازم مراتك تقرفك بعدم الاهتمام وانتا شايفها غساله ومربيه وشغاله ، هنا مفيش ده ، الكلام ده بره بس .
اقوله انتا غبي غبي قوي ، عارف بره مصر بيطبقوا تعاليم دينا الاسلام من غير مايكونوا مسلمين ، ده ديننا احنا كمسلمين ، امر كل واحد فينا بكده ، امرنا نكون طوعا لبعض نسمع بعض نعدي لبعض نسامح بعض نتعقل في كل شئ ، احنا مش بهايم ولا انا عايز اتجوز شغاله ، انا عايز اتجوز ست مربيه زوجه تشاركني كل حاجه حتي فكري ، وانا كمان هشاركها فكرها بس بتعقل زي مانا طالب منها تتعقل ، بص انتا مش هتفهمني عشان انتا شايف ان الراجل بينزل شغله يرجع ياكل وينزل يقعد مع اصحابه عالقهوه لحد الساعه 2 ويطلع هوب...... كالبهائم وينام ، طظ في دي حياه مفيهاش اي مشاركه ولا حتي تعقل ، ياابني انتا وهيا الحياه حاجه تانيه خالص ، الحياه مش اكل ولا شرب ولا خروجات ولا شوبنج ولا فلوس ولا عيال ولا جمال ، كل دي كماليات زي كده العربيه ال 128 لما تشتريها وتروح تنفخ وتجنط وتجيب اسبويلر وتركب طقم كراسي وطارة صغيره و مشغل اغاني وصب ووفر وحاجه اخر فخامه ، الحياه بقا هيا العربيه 😂 ، بتضحك ، طيب مش مهم المهم اني فهمت الرساله وانتا حر بقا تعمل بيها متعملش بيها بس انا بلغتك الرساله اللي صعب انك تفهمني قبل ماتفهمها. 
يله اشوفك مره تانيه بقا 
سلام